لو من الناس اللى فى دماغها سؤال ايه افضل فى التعلم اقرء كتير ولا اشوف افلام واغانى يبقى المقال ده ليك!
اولا خلينا نتفق على مبدئين مهمين جدا:
1- إنت هدفك من القراءة او الاستماع هو تعلم اللغة بكل جوانبها وزيادة الافكار مش تضيع الوقت
2- إن مفيش طريقة ناجحة غلط!!
هنا بقا إسمحلى أسألك انت بتتعلم ليه؟ هل هدفك تتكلم كويس ولا تكتب كويس؟
الاجابة هنا مرتبطة بالطريقة اللى انت المفروض تتبعها علشان تتحسن بشكل كبيير.. بناء على تجارب كتيير من متعلمين الانجليزى إتضح إن حضرتك لو عاوز تتكلم كويس يبقى لازم تسمع كتيير ولو عاوز تكتب كويس يبقى لازم تقراء كتيييير!
لما بتقرء انت بتستفيد بأفكار ومعلومات كتيير وده غير كم الكلمات اللى بتتعلمه عن نفس الموضوع واللى بيخلى عملية الكتابه عن نفس الموضوع عملية سهلة وممكنه هينقصها فقط المراجعة علشان لو فى اخطاء لغوية ودى بتحصل فى احسن العائلات حضرتك
نفس الكلام بالنسبه لتحسين التحدث بس هنا انا بنصحك تكون محدد فى البداية شويه بمعنى حدد المواضيع اللى انت حابب تتكلم عنها بشكل قوى فى البداية ومتختارش مواضيع عامة بل محددة, ابدء هات افلام او مقاطع فيديو او افلام وثائقية عن المواضيع دى وجمع منهم المعلومات اللى هتحتاجها, اسمع بقا الفيديوهات دى كتيييييييييير وانا قاصد كلمة اسمع مش شوف لانى عاوز تحفظ بودنك
طريقة نطق الكلمات وإزاى المحادثه بتحصل وياريت بقا لو يبقى في discussions& presentations عن المواضيع دى هيفرق كتيير وبردو هيبقى فيه شوية اخطاء لغوية واتفقنا انها مش مشكلة, مفيش حد مبيغلطش
فمتشيلش هم الجرامر بقا ونطقك صح ولا لا وتخلى الكلام ده يقفلك من اللغة واهمية تعلمها.
