انا معنديش حصيلة كلمات كتييره!
لما بسمع انجليزى مبعرفش اترجم!!
مشكلتى انى لما بقرأ انجليزى مبفهمش علشان معنديش حصيلة كلمات!!!
لو عندك مشكلة من دول كمل الموضوع للاخر..
اولا كده لازم تفهم ان الانجليزى فى الاول والاخر لغه بتستخدم للتواصل وده عمره ما هيحصل بشكل سهل وسليم لو انت معندكش حصيلة كلمات سليمة..
المفاهيم الغلط:
1- كتير مننا اتعود حفظ الكلمات بالورقه والقلم ويفضل يكتب كتيير ويعيد ويزيد كتيييير ايمانا منه ان دى الطريقة الصحيحه لحفظ واكتساب الكلمات.
2- الحفظ بشكل عشوائى .. يعنى حفظ كلمات فى مجالات بعيده عن مجالات اهتمامك
3- انك تبقى عاوز تحفظ مئات الكلمات يوميا علشان تبقى كويس فى وقت قصير
4- انك تبقى مبتدئ وعاوز تعرف مصطلحات وتعبيرات ومرادفات وكلمات ممكن نقول انها Advanced
الطريقة السليمة:
اولا: بالنسبه لطريقة الاكتساب نفسها ف لازم تكون منظمه شويه .. لا شويه مش كفايه ممكن نقول شويتين تلاته
1- اكتب فى ورقه وقلم اكتر 20 موضوع مهمين بالنسبه ليك علشان هما دول المواضيع اللى انت المفروض يكون عندك حصيلة كلمات كويسه فيها طبعا المواضيع ممكن تزيد او تقل على حسب كل حد فينا
2- كل موضوع هياخد معاك فتره من اسبوع لاسبوعين بحد اقصى .. فى الفتره دى انت هتقرء كتييير وهتتفرج على ناس بيتكلمو ف المواضيع دى ..وانت بتعمل كده هتلاقى كلمات كتييره جديده عليك والمفروض انك تفهم معنى الكلمات دى علشان تقدر تفهم المواضيع اللى بتقراها او بتسمعها .
3- غالبا ما هتكون متحمس فى الاول لكن بعد كده هتبقى حاسس بملل .. كمل الموضوع يستاهل
4- مش لازم تقرء كل المواضيع ولا تشوف كل الفيديوهات اللى بتناقش الموضوع ده .. حاول بس انك توصل للمرحله اللى هترضيك فاكتسابك للكلمات والجمل والعبارات اللى هتساعدك تعبر عن افكارك والافكار اللى هتكتسبها من قرأتك والاستماع.
5- المراجعه المستمره وده بيحصل عن طريق استخدامك للكلمات اللى بتكتسبها سواء كان فى الكتابه او التحدث
ثانيا: لازم تكون عارف كويس مستواك ف لو انت مبتدئ اعرف ان اللى انت محتاجه فى المرحله اللى انت فيها انك تعرف تعبر عن نفسك وتكون عارف تكون جمل.. لازم كمان تكون عارف الفارق بين نوع الكلمة (اسم – صفه – فعل – حال – ضمير – اداة استفهام)
لو انت حد مش مبتدئ ف لازم تكون عارف تفاصيل تانيه زى ايه هيا ال word roots للكلمه دى .. فمثلا كلمة easy معروفه انها صفه لكن مش كتير عارف ان كلمة ease دي فعل بمعني يسهل وهيا نفسها ممكن تيجي كاسم بمعنى سهولة وان easily دى حال بمعنى بشكل سهل.
مهم باردو تعرف عن الاسم اللي بتستخدمه ده
(singular or plural- countable or uncountable – regular or irregular)
لو ده فعل ف لازم تعرف
(Verb endings – regular or irregular verb- transitive or intransitive )
وغيره من معلومات عن كل نوع من انواع الكلام …
المووضوع ملهوش علاقه خالص بكم الكلمات اللى عندك .. لو انت قدرت تعبر عن افكارك وتوصلها بشكل سليم تبقى تمام .. وده طبعا للناس اللى بتشوف الانجليزى لغه للتواصل مش للمبارزه والتعقيد
اخيرا اللى انا كتبته فوق ده ممكن جدا يجيب نتيجه مع كتيير من الناس وممكن ميجبش نتيجه معاك انت .. ده مبيقولش انها غلط بس ده بيدل ان فيه طريقة تانيه هتتماشى معاك وهتكتسب بيها .. حاول وجرب ومتحكمش بفشلك وبفشل الموضوع قبل ما تجرب
