من المشاكل اللى بتوقفنا عن التقدم هو عدم الفهم السليم لخطواتنا ولأهمية كل خطوه ونتيجتها.
خلينا نتفق ان في فرق كبير بين الـ Accent والـ Pronunciation وان الاثنين مش معناهم النطق
اولاً:
pronunciation
ودى غالبا المقصود منها مخارج الألفاظ. يعنى هل حضرتك بتنطق الاصوات بالشكل السليم ولا لا
ثانياً:
Accent
و دى بقا المقصود بيها طريقتك او الـ Style بتاعك وانت بتنطق الكلمات (مش الاصوات) هل طريقتك دى كانت امريكية ولا بريطانية او غيرها
بناء على اللى فات خلينا نتفق على كذا نقطة:
1- حضرتك مش مطالب منك تتكلم زى الامريكان بالظبط او زى البريطانين بالظبط (لو بتعرف ف انت موهوب) لان اللغه الهدف منها التواصل ف لو بتعرف تتواصل مع اللى حواليك باستخدامك اللغه ف انت حققت الهدف منها.
2- ده مش تصريح لحضرتك انك تنطق غلط طالما اللى قدام فاهمك او بيحاول يفهمك بس ده علشان متحطش لنفسك عائق كبير هوا ال Accent
3- لو انت مبتدئ ف اخر حاجه تهتم بيها هيا النطق كده كده هتتحسن فيه شوية بشوية, اهم حاجه تعرف المبادئ والاساسيات وتعرف تستخدمهم امته وليه وتطبق على كده كتييييييييييييييييييير (التطبيق هوا الممارسة)
4- ال Accent مش معناها انك تتكلم بسرعه, ودى باردو حاجه مش المفروض تهتم بيها لو انت مبتدئ
5- انك تتكلم انجليزى ب Egyptian Accent مش جريمة هتتعاقب عليها وعادى لو نطقتها waTer و InTerview
اخيراً انت ممكن تتفق او تختلف معانا فى النقاط دى وعلشان كده خلينا نفكرك مرة تانية ان الهدف من اللغة هو التواصل مش عدمه, ومن هنا اى حاجه هتسهل عملية التواصل هتبقى صح والعكس صحيح.
